Sikyu patay sa motor misampak sa SUV

CEBU Philippines - Patay ang usa ka security guard supervisor dihang ang motorsiklo nga iyang giluwanan nadumbolan sa usa ka pribadong sport utility vehicle (SUV) ug nalahos pa ngadto sa usa ka jeep pasaheroan alas-7 pasado ang takna sa buntag kagahapon sa dalan A.C. Cortes Avenue sa barangay Cambaro, dakbayan sa Mandaue.

Ang namatay mao si Nicomedez Noblesa, 47, taga 341 P. Burgos St., barangay Centro, dakbayan sa Mandaue ug nakadumbol nga SUV mao ang usa ka Toyota Fortuner nga nagdala sa plate number YGE 890 ang gimaneho usab ni Bryan Toledo, 28, taga San Vicente Village sa barangay Subangdaku, dakbayan sa Mandaue.

Si PO2 Dante Flores sa Traffic Division sa Mandaue City Police Office (MCPO) nga nahinabi sa Banat News miila usab sa naangol nga pasahero sa jeepney mao si Jonjet Edar, 37, taga dalan Mantawi sa barangay Poblacion sa dakbayan sa Lapulapu.

Wala hinuon maunsa ang drayber sa jeepney nga si Christopher Borbon Salazar, 23, taga Calubihan sa lungsod sa Barili.

Matud pa ni Flores nagsubay sa A.C. Cortes Avenue ang jeepney nga gimaneho ni Salazar paingon sa dakbayan sa Lapulapu samtang nagsunod usab ang motorsiklo nga gimaneho ni Noblesa.

Sa paghidangat sa maong dapit ang SUV nga gimaneho ni Toledo kalit lang midumbol sa motorsiklo hinungdan sa pagkasaliring ni Noblesa dayon ang SUV nalahos sa pagdumbol sa jeepney.

Matud pa ni Flores nga si Noblesa nakabaton og grabeng kadaot sa iyang kalawasan gidala sa Mandaue City District Hospital apan gideklarar sa mga doktor nga dead on arrival.

Ang pasahero sa jeepney nga si Edar nakabaton usab og bun-og sa iyang kalawasan ug gidala sa mao gihapong tambalanan apan luwas na kini sa kuyaw nga kahimtang.

Si Toledo mitahan ngadto sa kapolisan human sa aksidente ug kasamtangan karong gibalhog sa bilanggoan samtang nagpaabot sa tukmang kasong ipasaka. (Romeo Limpangog) (BANAT NEWS)