CEBU, Philippines - Kritikal ang kahimtang sa usa ka 34-anyos nga lalaki human gidunggab sa iyang lusong-lusong sa 62 anyos nga lolo nga iyang kauban sa trabaho diha sa barangay Cansaga lungsod sa Consolacion niadtong Domingo sa alas 2:00 sa hapon.
Ang biktima mao si Raul Conag, 34, molupyo sa nahisgutang lugar. Samtang ang suspek mao si Bonifacio Ordiz Sr., 62, kauban ra sa trabaho sa biktima sa paghimo og sago ug pulos tupad og lawak sa kwarto ilang gi-abangan sa maong lugar.
Matud ni Chief Insp. Bonifacio Tecson, hepe sa Consolacion Police dihang nahinabi sa Banat News subay sa iyang pagsukit-sukit sa suspek namasangil kining kanunay siya nga biklon sa biktima.
Giingong kanunay mangita og away ilabina kun siya maminaw og radyo diha sa ilang gi-abangang lawak kanunay kining moreklamo. Apan niadtong Domingo subli na usab siyang gipasingitan sa biktima nga nagdala og kawayan ug gihataan siya og bunal hinungdan nga nagdali siyang nipauli ug pagbalik nagdala na og kutsilyong giluklok sa hawak.
Matud pa gikomprontase sa suspek ang biktima apan gisuwayan siya og sumbag niini hinungdan nga giluba niya kini sa lusonglusong ug human maigo nagdali siya pag-ikyas ug mitahan sa mirespondeng polis.
Ang biktima daling gihatod lahos sa Vicente Sotto Memorial Medical Center (VSMMC) nga sa paghimo ning balita gihulagway’ng anaa sa kritikal nga kahimtang. (BANATNEWS)