CEBU, Philippines - Patay’ng lawas sa usa ka tawo nga nadugta na ang napalgan sa payag-payag nga nahimutang sa dalan Don Andres Soriano Ave. sa sitio Tribunal sa barangay Centro, dakbayan sa Mandaue.
Si SPO3 Kerwin Bejer sa Investigation Detection and Management Bureau (IDMB) miila sa patay’ng lawas nga mao si Wilfredo Sayno, nagpuyo sa Talamban sa dakbayan apan lumad nga taga dakbayan sa Naga ug manguykoyay og basura. Matud pa ni Bejer nga namatikdan sa mga tawo nga molabay sa maong dapit ang pagpangalisbo sa hilabihang kabaho hinungdan nga gipahibalo nila kini sa kapolisan.
Sa ilang pagsusi sa usa ka payag-payag nga gitabilan lang og sako ilang nadiskubrehan ang patay’ng lawas nga gitapok-an na sa daghang mga ulod.
Si Bejer miingon nga base sa ilang nahibaw-an sa pipila ka mga tawo sa maong dapit nga ang namatay gikan nga manguykoyay og basura adto na mag-ulian sa gihimo niining payag-payag sa maong lugar sulod na sa pipila ka mga bulan.
Sa pasiunang pakisusi sa mga sakop sa Scene of the Crime Operatives (SOCO) ilang gibanabana nga lima na ka adlaw nga namatay si Sayno. - BANAT NEWS