Imbestigasyon sa tulis sa prendahanan sa Carmen gipalawman

CEBU, Philippines - Gipalawman sa kapolisan sa lungsod sa Carmen ang imbestigasyon bahin sa nahitabong tulis sa M. Lhuillier Pawnshop diha sa barangay Cantipay niadtong Biyernes sa gabii.

Si Inspector Carlos Reyes Jr. hepe sa Carmen Police Station mibutyag sa Banat News kagahapon nga may mga kawani sa maong establisamento nga gipakuhaan niya og mga finger print sa Scene of the Crime Operatives (SOCO).

Gawas niini mipahigayon usab sila og imbestigasyon sa maong mga kawani.

Matud ni Reyes nga gituohan nilang usa ka inside job ang maong hitabo diin ang nagbuhat niini malagmit may kahiubos sa tagdumala tungod kay giingong gibalewala lang ang ilang mga yango-ngo nga patas-an ang ilang sweldo ug ubang benepisyo.

Gisandig ni Reyes ang ilang katahap sa ka-suhito sa mga tulisan sa pagtultol sa sudlanan sa kwarta sa maong establisamento.

Si Reyes nanghinaot nga mosuporta kanila ang tanang kawani sa pawnshop aron masulbad pagdali ang maong kaso.

Kahinumdoman nga sa gibilin nga demand letter sa mga tulisan gawas sa gipadayag nilang mga yango-ngo, bahin sa umento sa suweldo ug uban pang benepisyo, mihulga usab kini kang Edward Loop, administrator sa pawnshop nga kung dili kini mo-resign sunogon nila ang maong prendahanan. – BANAT NEWS