Narco-politics nia sa Sugbu?

CEBU, Philippines - Nagduda ang independenteng kandidato sa pagkakonsehal sa north district nga si James Philip "Jimboy" Tionko nga may narco-politics dinhi sa dakbayan nunot sa pagpusil patay kang Crisistomo “Tata Negro” Llaguno niadtong Martes sa hapon diha sa barangay Lorega San Miguel ning siyudad sa Sugbu.

 Matud pa ni Tionko nga base sa record sa Cebu City Police Office usa ka suspected drug dealer si Llaguno, dugang pa niini ang gisubay karong anggulo ug motibo sa kapolisan mao ang kalambigitan sa negosyo sa illegal nga drugas.

Butang nga gihimakak og maayo sa mga kabanay ni Llaguno ug miinsister nga wala malambigit sa drug trade ang namatay gawas lang sa negosyong computer nga hulogan og piso.

 “It is politically motivated, because he is a political candidate. He was a suspect of drug dealings and now this is a twice narcopolitics, ato pa kini pakapinan, now it is political killing. Narco-politics plus political killings,” sigon pa ni Tionko sa interbyu sa DyRF.

Samtang gikwestyon niini ang pagpakahilom ni Vice Mayor Michael Rama nga giingong higala ni Llaguno taliwala sa pagkondena sa halos tanang mga kandidato sa Sugbu.

Matud pa niya nga plano unta niyang himuong testigo si Llaguno batok sa gipasakang kasong libelo ni Rama kaniya human niya tawgang ‘drug lord protector’ ang bise mayor. – BANAT NEWS