Hontiveros mikatawa sa balita

CEBU, Philippines - Si senatorial candidate Risa Hontiveros sa Liberal Party(LP) mikatawa sa taho nga matud pa si Datu Unsay Andal Ampatuan Jr. miindorso sa kandidatura nila ni Senador Noynoy Aquino III , Senador Mar Roxas, ug kaniya mismo.

Si Hontiveros nga nakurat pagkadungog sa maong balita nagkanayon nga dili siya makatuo niini ug miingon nga kadto lamang mga dili tarong og pangisip maoy nagpalabong sa maong balita.

Matud pa niya nga makapaduda kining balitaa kay nahitabo ang giingong pag-endorso kanila human ang duha ka Ampatuan palingkawasa sa Department of Justice gikan sa kasong murder nga ilang giatubang nga may labot sa pagmasaker sa 57 ka mga tawo didto sa Maguindanao sa miaging tuig luyo sa kalig-on sa mga ebidensya batok kanila .

Alang kang Hontiveros, siya nagtuo nga ang utok sa maong masaker malagmit giawhag   sa ilang numero unong supporter nga si Presidente Gloria Macapagal Arroyo nga ipaindorso ang LP aron nga dili kaayo sila atakehon og panaway.

Matud pa niya nga usa na usab kini ka laing black propaganda sa gitawag niyang Villaroyo camp. (BANATNEWS)