Reporter way malisya sa iyang gisuwat

CEBU, Philippines - Andam atubangon sa reporter sa Sunstar Daily nga si Elias Baquero ang paglakip kaniya sa kihang libelo nga gipasaka ni kanhi Cebu customs collector David “Boy” Odilao ngadto kang Anad Partylist Kong. Pastor Alcover Jr.

Si Baquero sa text nga gipadala dinhi sa Banat News nagkanayon nga nasayod siyang mapapas iyang pangalan sa mga gireklamo sanglit wala siya’y malisya sa pagsuwat sa maong balita. Ang gitamdan ni Odilao sa gidusong kaso mao ang kabahin sa news item nga napublikar sa nahisgutang pamantalaan niadtong Abril 10, 2010 nga si Odilao gipasanginlan ni Alcover nga midawat og kwarta gikan kang Mayor Rodrigo Duterte sa Davao.

Si Alcover ug Duterte aduna nay panagbangi sulod sa pipila ka mga bulan ug nagkatinubagay na sa ilang tagsa-tagsa ka mga radio programs.

Lakip sa gipasangil ni Alcover kang Odilao mao ang giingong pagdagan ni Odilao sa kwarta sa Anad hinungdan nga iyaha kining gitaktak niadtong Pebreo 10, 2010.

Apan ang maong mga pasangil gihimakak tanan ni Odilao ug nagkanayon nga dunay malisya ang maong balita sanglit wala gani siya kuhai og pamahayag ni Baquero aron makadepensa sa iyang kaugalingon.

Matud pang Baquero nga wala siya’y malisya sa pagsuwat sanglit ang managkaaway mao sila si Odilao ug si Duterte ug igo ra siyang misuwat sa balita.

“I consider the inclusion of my name in the libel case filed by David Odilao Jr. against Anad Partylist Rep. Pastor Alcover Jr. as one of the hazards in journalism. I’m sure, I will be exonerated because I have no malice in writing about the Odilao-Alcover political bickering. As a matter of fact, Odilao called me and congratulated me for writing a factual news item when the controversy first came out,” ni Baquero sa iyang mensahe sa text.

Si Odilao mipasaka og kasong libelo diha sa piskaliya sa dakbayan sa Talisay niadtong Abril 15, 2010 batok kang Alcover, Baquero ug Isolde Amante, editor-in-chief sa Sunstar Daily.  – BANAT NEWS