Lalaki nahadlok sa checkpoint sikop

CEBU, Philippines - Usa ka "armadong" lalaki nahadlok sa gipahigayon nga checkpoint sa kapolisan sa Investigation and Detective Management Branch (IDMB) mi-eskapo ug misulod sa usa ka panimalay sa dalan F. Sotto, barangay Camputhaw pasado alas 8 sa miaging gabii.

Si Eugenio Aposaga, 22, molupyo sa barangay Kalunasan nasikop sa kapolisan human kini misuway pag-eskapo.

Nasayran nga ang grupo sa IDMB mipahigayon sa ilang checkpoint sa nahisgutang lugar apan adunay nabantayan ang grupo sa IDMB nga duha ka lalaki nga nagsakay og motor. Apan sa kalit lang nabantayan sa kapolisan nga mideretso og U-turn ang duha aron makalikay sa gipahigayong checkpoint apan wala lang damha nga na-slide ang motor. Dali untang giduol sa kapolisan ang duha, apan ang drayber miikyas samtang si Aposaga dali usab nga nakadagan sa usa ka panimalay.

Apan nasayran sa kapolisan nga ang tagbalay dali usab nga nakagawas sa ilang panimalay human nila mabantayi nga gikatahong armado si Aposaga.

Na-korner si Aposaga ug wala madugay nasikop ra usab sa kapolisan ug nakuhaan og usa ka paketeng gituohang shabu.

Samtang girikisa usab si Aposaga sa pagtuo nga kini adunay dala nga armas apan negatibo ang resulta sa maong taho. Nasayran usab sa kapolisan nga ang plate number nga gigamit sa duha dili orihinal hinungdan nga ila kini nga gitaho ngadto sa City Traffic Operation Management (CITOM).– BANAT NEWS