Kasong Diamante gihangyong ibasura

CEBU, Philippines - Gipaabot nga mopagawas sa iyang resolusyon ang hukmanan sa awhag sa manlalaban ni magpapatigayon Democrito Diamante nga nagpapili karon sa pagka -mayor sa lungsod sa Tuburan, nga ibasura ang kaso nga gipasaka batok kaniya nga mao ang pagpayuhot og mga alahas nga nagkantidad og P17 milyones agi sa tugpahanan sa Mactan Cebu International Airport, may siyam na ka tuig ang milabay.

Si Diamante karon gawasnon human siya makabutang og pyansa alang sa iyang temporaryong kagawasan.

Gitumbok nga si Diamante uban sa laing kauban misulay pagpayuhot sa 17 ka kartong alahas niadtong Hulyo 3, 2000.

Ang maong mga karton gikataho nga gisudlan sa mikabat og 3,515 ka relo uban sa lain pang mga kartong walay sulod.

Apan gialigar nga kwestyonable ang mga dokumento base usab sa mga kargamento nga nasakmit sa mga tinugyanan sa Bureau of Customs.

Si Maghuhukom Toribio S. Quiwag sa Branch 27 sa Lapu-Lapu Regional Trial Court gipaabot nga mopagawas sa resolusyon human si Manlalaban Ricardo Amores miawhag sa korte nga ibasura ang kaso nga gisang-at sa iyang kliyente.

Nahibaw-an nga ang habig sa prosecution natapos na sa pagpresentar sa ilang mga ebidensya uban sa mga testigos batok ni Diamante.

Si Manlalaban Amores miawhag sa korte nga ibasura ang kaso batok sa iyang kliyente gumikan sa kakulang og mga ebidensya kay gani ang testigos sa prosecution wala makaila sa iyang kliyente atol sa husay.

Matud pa ni Amores nga sa maong husay gipresentar ang mga ebidensya batok sa iyang kliyente ug bisan og mitambong ang iyang kliyente, wala makaila ang testigos kaniya.

Apan ang habig sa prosecution mipresentar usab og mga ebidensya pagpalig-on sa kaso ni Diamante kinsa kusganon nga nanghimakak sa pasangil batok kaniya. (BANATNEWS)