Kandidato nailad; P3 milyones nahanaw

CEBU, Philippines - Nagpakitabang sa buhatan sa National Bureau of Investigation kon NBI-7 ang kaatbang ni reelectionist Kongresista Eduardo Gullas sa unang distrito sa Sugbu sa pagkakongresista human kini mailad sa ‘boodle gang’ ug nakuhaan og dili mominus P3 milyones didto sa Manila.

Ang mireklamo diha sa NBI mao si Luna Sabalones, 52, lumad nga taga North Poblacion, San Fernando ug kandidato sa pagkakongresista sa unang distrito ubos sa Partido ng Masang Pilipino kon PMP ni kanhi Presidente Joseph Estrada.

 Nagduda si Sabalones nga kakunsabo sa maong mga mangingilad mao ang usa sa iyang mga kauban(pangalan gipugngan sa Banat News) sa partido nga kandidato usab sa lungsod sa San Fernando.

Matud pa niini nga ang maong gidudahan niyang kapartido maoy mipaila kaniya niadtong bulan sa Hunyo sa usa ka ginganlan og ‘Boy’ kinsa mao usab ang mikombinsir kaniya nga mopagawas og pundo aron mohimo og mini nga kwarta aron ilang gamiton sa umaabot nga election.

 Sumala pa ni Sabalones nga gipahimangnoan siya sa iyang igsuon nga si Luis Sabalones nga dili mopadala niini tungod kay kini usa ka matang sa pangilad.

Apan dihang miadto na siya sa Manila aron pagkuha sa iyang appointment isip kandidato sa pagkakongresista ubos sa PMP sa balay mismo ni Estrada sa San Juan, Manila niadtong Peb 8 hangtud sa Febrero 13, nakigkita si Boy.

Kuyog ni Boy ang usa ka gipailang ‘Anita’ ug laing tulo   pa ka mga lalaki ug gipangayoan siya og P10 milyones.

Sumala pang Sabalones nga mura siya og na-hipnotismo bisan paman sa pasidaan sa igsuon ug nakahatag gyud siya og P3 milyones.

Giingong ang usa ka milyon niini maoy ipalit og kemikal aron malimpyo gyud ang pag-imprinta sa mining kwarta samtang ang P2 milyones maoy kopyahan alang sa himuong mini nga kwarta.

 Si Sabalones maoy mipa- in-cash sa managers check sa usa ka bangko sa Manila ug gisulod kini sa bag ug gidala sa usa ka balay nga gidili ang padala og cellphone ug ang pagdala og mga kauban.

Matud pa ni Sabalones nga human makopyahe ang iyang gidalang kwarta gipakita pa siya pagputos ug pagbandol niini og balik ug gisulod sa pulang bag una gitunol kaniya.

Sumala pa niya nga gipahimangnoan siya sa maong mga lalaki nga dili kini dayon paablihan. Diha nalang niya kini ablihi pag-abot dinhi sa Sugbu ug mao nalay iyang kakugang dihang giilisan na ang bag ug sulod niini pulos mga ‘budol’ nga kwartang gitabas nga papel.

Si Sabalones nagkanayon nga iyang gipahibawo ngadto sa publiko ang iyang gidangatan aron usab makabantay ang ubang mga politiko dili lamang dinhi sa Sugbu sanglit nakadungog siyang may laing target ang grupo nga mga kandidato sa Manila, Davao, Capiz ug Antique.    (BANATNEWS)