CEBU, Philippines - Nagubot sa makadiyot niadtong miaging kaadlawon ang usa ka videoke bar sa barangay Lawaan II, dakbayan sa Talisay human usa sa duha ka security guard nga nag-inom nagpabuto og armas punting sa pikas lamesa ug pagkahuman gikulata sa batan-on nga gipabuthan.
Ang duha ka guwardiya mao sila si Jeffrey Moreno, 23, taga Mohon, Talisay ug Ricky Garces Capoy, 24, taga Borromeo Estate, Lawa-an II. Ang duha pulos sakop sa Mesda Security Agency.
Ang gipabuthan mao sila si Junjun Benlot, 20, stay-in worker sa tindahan og linarang sa Lawaan I, Talisay nga lumad nga taga Nagsaha, Guihulngan, Negros Oriental ug Edwin Saberon, 30, nagpuyo sa sitio Kasagingan, Lawaan II, Talisay.
Sa imbestigasyon nilang PO3 Narciso Alforque ug PO1 Erwin Denila, nasayran nga nanag-inom si Benlot kuyog ni Saberon sulod sa videoke bar nga gipanag-iya sa usa ka “Loida.” Ang duha ka guwardiya sa pikas lamesa kalit lang nanghasi ug usa kanila nagpabuto og .38 kalibre nga rebolber makatulo ka higayon punting ngadto nilang Benlot ug Saberon.
Sa dihang nabatyagan nga wala nay bala ang rebolber, daling giduol ni Saberon ang duha ka guwardiya ug gikulata.
Sa maong panghitabo natapsingan sa tangkugo si Benlot, samtang nakalihay si Saberon samdan ang tuo niining kamot gumikan sa pagsumbag sa guwardiya.
Samtang gitino sa kapolisan sa Talisay Police Station kun si kinsa sa duha ka guwardiya ang nagpabuto. (Raymond D. Abarcas UV-Journalism Intern) (BANATNEWS)