Donasyong luna sa City Hall diha sa SRP nameligro tungod sa insidente sa Lahug

CEBU, Philippines - Hugot nga gikondinar ni Cebu City Administrator Francisco Fernandez ang tinguha sa University of the Philippines (U.P.) Cebu pagkural sa luna niini diha sa barangay Lahug nga giukupahan sa mga nasunugan.

Lakip sa gisaway ni Fernandez mao ang hukom ni RTC Judge Sylva Paderanga nga naghatag og pagtugot sa U.P. nga makural ilang luna.

Matud pa ni Fernandez nga immoral ang desisyon sa huwes ug mahimo nga kini maoy himuong panag-ingnan sa mga landowner pagbawi sa ilang luna.

Partikular na niini kadtong mga luna nga gipuy-an sa mga urban poor dili lang dinhi sa Sugbu kun dili sa tibuok kapupud-an.

“Ug legal nang order nila, I think that is a very immoral order nga dili na patukuron og balik ang mga nasunugan because they have just institutionalized a system how to evict people and I think that it is grossly unfair,” sumala ni Fernandez.

Andam mangulo ang City administrator pagbabag sa tinguha sa U.P. bisan pa man kung siya i-contempt sa korte sa iyang buhaton.

Wala usab palabya sa City administrator ang tagdumala sa U.P. Cebu nga maoy nagtinguha pagkural sa ilang luna nga gipuy-an sa mga nasunugan.

“It is very sad nga ang institution of morality mao ang eskwelahan pero mao na hinuon ang nag-introduce og very immoral act of evicting people,” matud ni Fernandez.

Nasayran nga ang kagamhanan sa dakbayan nidonar og lima ka ektaryang luna sa South Road Properties (SRP) nga mobalor og P500 milyones ngadto sa U.P.

Irekomendar karon ni Fernandez ngadto kang Mayor Tomas Osmeña nga kanselahon ang pagdonar sa siyudad og luna sa U.P. kung kini mamugos sa ilang tinguha.

Una nang gibutyag sa mayor nga iyang gitugyan ngadto sa City administrator ang pag-atiman sa nahisgutang problema diha sa barangay Lahug.

Gipadayag ni Osmeña nga iyang aprubahan ang bisan unsang rekomendasyon nga himuon ni Fernandez bisan pa man kung giangkon niini nga komplikado ang maong sitwasyon.

“If Bimbo will give a go signal then I will put a squeeze on U.P….pero nganong mangita man ta og away…just let things be status quo,” sumala pa ni Osmeña.

Gipaabot hinuon nga maglisod ang U.P. pagkural sa ilang luna nga giukupahan sa mga fire victims tungod kay kini nanginahanglan pa nga molukat og fencing permit gikan sa barangay.

Gipahibawo na ni Lahug barangay captain Mary Ann delos Santos nga iya pang huna-hunaon ang paghatag sa maong permit tungod kay giingong dunay nisupak nga mga molupyo kabahin niini.

Ang kapitan maoy unang mibabag nga makural ang luna nga giukupahan sa mga nasunugan hinungdan nga nisang-at og reklamo ang U.P. ngadto sa korte. - Elly Bolonos (BANAT NEWS)