CEBU, Philippines - Kapin sa 200 ka mga basurero diha sa Inayawan Sanitary Landfill ang nitabang pagpawong sa aso diha sa nahisgutang dumpsite gumikan kay hasta sila naapektahan na sa padayong pagsilaob niini sugod niadtong Biyernes.
Kini maoy gibutyag sa labaw sa Department of Public Services (DPS) nga si Engineer Dionesio Gualisa nga nisusi sa landfill.
Giangkon ni Gualisa nga nagpadayon pa ang aso sa dumpsite apan nagtuo ang labaw sa DPS nga kini ila nang makontrolar sa musunod nga mga adlaw.
Gisalikway hinuon ni Gualisa ang mga kabalakang mahatag sa aso, tungod kay kini giingong dili susama ka baga sa nangaging mga buwan. Gani ang apektadong mga molupyo palibot sa landfill giingong wala na modemanda og kasamtangang kabalhinan samtang nagpadayon pa ang pag-aso sa dumpsite. (BANATNEWS)