Davide namutos na

CEBU, Philippines - Naghinay-hinay na og pamutos ang mga staff ni Cebu City Acting Vice Mayor Hilario Davide III sa ilang mga butang sulod sa ilang buhatan sa City Hall.

Kini dihang gipahibawo sa plano sa acting vice mayor nga moluwat na sa katungdanan human usab itudlo isip provincial chairman sa Liberal Party (LP) sa Sugbu.

Matud sa Executive Assistant ni Davide nga si Marichu Borres, mapugos unya sila pagbiya sa City Hall tungod kay sila pulos mga co-terminus.

Ang acting vice mayor dunay lima ka mga staffs nga sila si Eunice Reyes, Rosemary Pedrera, Bernardo Bawasanta, Albereto Durango Jr., gawas kang Borres.

Wala pa masayod sila si Borres ug kaubanan kung asa sila padulong kung makaduso na sa iyang resignation letter si Davide.

“Magpaabot lang mi ani kung unsa ang isulti ni councilor basta kami naghinay-hinay na og panghipos diri sa office,” sumala ni Borres.

Gitataw hinuon ni Davide nga magpabilin sa iyang buhatan ang iyang mga sakop hangtud mahuman ang ilang kontrata unya sa Disyembre.

“They have until December man sa ilang pagka-casual employee magpabilin pa sila sa office aron maoy mo-follow up sa akong mga clearances,” sumala pa ni Davide.

Nagplano hinuon si Davide pagbalhin sa iyang mga staff ngadto sa iyang ablihan unya nga LP headquarters dinhi sa Sugbu.

Ang acting vice mayor mao gihapon ang mo-preside sa sesyon sa City Council ugmang adlawa ug kini na maoy iyang giingon nga katapusan.

Nasayran nga duna gihapoy mga resolusyon nga ipalabang si Davide atol sa sesyon nga naglakip sa mga requisition sa pipila ka mga barangay.

Dunay pending usab nga ordinansahon ang acting vice mayor alang sa pag-color code sa mga spaghetti wires sa mga utility firm nga gitakda na alang sa public hearing.

Gipadayag hinuon ni Davide nga iyang hangyuon si Konsehal Nestor Archival nga maoy mopadayon sa iyang gipalabang nga ordinansahon.    (BANATNEWS)