Nagpinatyanay gumikan sa negosyo

CEBU, Philippines - Panagribal sa negosyo ang usa sa anggulo nga nakita sa mga polis sa nahitabong pinusilay atol sa bisperas sa piyesta sa barangay Maghaway, dakbayan sa Talisay diin upat ang patay ug duha ang angol niadtong Biyernes sa gabii, matud pa ni Superintendent Henry Binas , hepe sa kapolisan sa maong dakbayan sa pakighinabi sa Banat News kagahapon.

Kahinumduman nga ang nakabsan sa kinabuhi sa maong hitabo mao si Kagawad Pedro Delvo, sa Maghaway, kinsa giila usab nga lider sa Alimaong, usa ka kahugpongan sa mga lumad, ang umagad niining si Alex “Nonoy” Murallos, Jonifer Villacencio ug Melchor Tabay, samtang ang naangol nga tanod sa barangay mao si Felix Abacahan Jr.

Ang laing tawo nga natapsingan sa bala atol sa hitabo, wala pa hiilhi sa kapolisan sa pagsulat ning maong balita.

Si Binas nagkanayon nga si Delvo nagnegosyo og “ scrap” sa maong lugar, apan giatbangan kini ni Abacahan.

Ang Maghaway maoy silingang barangay sa Tapul diin mahimutang ang basurahan sa dakbayan sa Talisay.

Sumala sa record, si Delvo napusilan na sa miaging tulo ka tuig nga nakalabay ug usa sa gidudahan nga mipusil kaniya mao si Abacahan.

Matud ni Binas nga ang maong unang bangi sa duha , naggumikan gihapon sa panagribal sa ilang negosyo.

Sa pagkakaron gipalawman pa sa kapolisan ang imbestigasyon aron masuta kun kinsa gyu'y nanguna sa maong pinusilay.

Nasayran nga sa wala pa ang maong hitabo, sila si Delvo ug si Murallos misakay sa usa ka dump truck nga gikan sa landfill paingon ngadto sa barangay hall aron motan-aw sa kalingawan.

Niadtong tungora si Abacahan, maoy tanod nga nag-duty kauban sa iyang mga sagabay nga sila si Villacencio ug Tabay nga nagbantay sa kalinaw ug kahusay sa kalingawan.

Apan matud pa ni Binas nga nakurat nalang ang nanambong sa kalingawan dihang mipaka-paka na ang mga armas de fuego nga miresulta sa kamatayon sa mga biktima.

Sa pagkakaron padayon pang nangapkap og mga saksi ang kapolisan samtang ang tanang nalambigit sa maong hitabo gikuhaan na usab og paraffin test lakip niadtong mga nakabsan sa kinabuhi. - BANAT NEWS