Kabahin Sa Away Ni Pacman Ug Hitman Kapolisan dili magkumpiyansa - opisyales

CEBU, Philippines – Gipahimangnoan karon ni Cebu City Acting Vice Mayor Hilario Davide III ang kapulisan sa dakbayan nga dili magpabaya sa ilang katungdanan ug pabiling magmabinantayon atol sa subling pagsaka sa boxing ring ni Manny “Pacman” Pacquiao karong adlawa aron makigsangka sa Briton nga si Ricky “Hitman” Hatton.

Nabalaka si Davide nga mopahimulos ang mga badlungon sa katilingban samtang ang mga Sugbuanon malingaw og tan-aw sa away.

Apan base sa nanglabay’ng sangka ni Pacquiao mas menus pa hinuon ang nangatalang krimen dili lang sa Sugbu kundili lukop nasud, didto sa Manila dihay usa ka sangka ni Pacquiao nga ‘zero crime’ gyud.

Si Davide isip acting vice mayor ug acting chairman sa Police Coordinating and Advisory Council (PCAC) miingon nga mas maayong dili mokompiyansa ang mga polis.

“Dili gyud angay nga mokompiyansa ang kapulisan kay wala ta masayod sa huna-huna sa mga badlungong mopahimulos unya sa higayon,” sumala ni Davide.

Sa susamang kalamboan gitambagan usab sa acting vice mayor ang mga Sugbuanon nga magbantay sa ilang mga panimalay samtang mutan-aw sa away ni Pacman.

Gidasig usab ni Davide ang mga Sugbuanon nga mag-ampo alang sa kadaugan ni Pacquiao nga giila usab nga pound for pound king sa natad sa boksing sa tibuok kalibutan.

Samtang si Sr. Supt. Patrocinio Comendador, director sa CCPO nagkanayon mag-atubang og kasong administratiba ingon man kriminal kadtong mga police nga masakpang mobiya sa ilang trabaho aron lang motan-aw sa away. Kasong abandonment of post ingon man neglect of duty ang ilang ipasaka ngadto sa mga police nga masakpan, apan aron masigurong walay magpabadlong nga mga sakop dunay gitahasang mo-supervise sa mga police nga duty aron maoy motan-aw kun wala ba biyai ang ilang mga pwesto.

Mopadala usab og mga polis sa mga establisamentong dunay pay-per-view, usa na niini ang Cebu Coliseum. - Elly Bolonos uban sa report ni Guam Logroño (BANAT NEWS)