Swine-flu drill sa siyudad giplano

CEBU, Philippines – Nagplano ang gitukod nga Swine Flu Task Force sa kagamhanan sa dakbayan sa Sugbu pagpahigayon og Swine Flu Drill aron makita ang katakos niini pagtubag sa emerhensya kung makasulod sa Sugbu ang maong gikahadlukang sakit.

Matud sa pangulo sa Swine Flu Task Force nga si Dr. Nestor Alonso nga iyang pakigtagboan karong Lunes ang iyang mga sakop aron pahibaw-on sa iyang plano samtang padayon nga nikatap sa ubang kanasuran ang giingong “human to human infection” sa swine flu virus.

“Mag-dry run gyud ta aron makita nato atong capacities, deficiencies kay tingali og magkamuritsing ta kung moabot na ang higayon,” sumala ni Alonso.

Gibutyag ni Alonso nga usa sa mga lawak sa Vicente Sotto Memorial Medical Center maoy himoon nilang infectious ward, ang maong dry run hayan himuon sunod semana.

Ang kinatibuk-ang dakbayan gideklarar na sa City Council ubos sa state of disaster preparedness tungod sa gikahadlukang swine flu aron magamit ang calamity fund pagpalit sa gikinahanglang mga kagamitan kontra sa maong sakit.

Ang swine flu gikatahong nagsugod sa Mexico ug mikalas na sa kapin sa 150 ka kinabuhi gikan sa maong nasud ug daghan pa ang nangalandig sa tambalanan. - Elly Bolonos (BANAT NEWS)