Mga bata sa gi-demolish nga kabalayan sa Talamban nangasakit

CEBU, Philippines – Nangasakit na ang pipila ka mga biktima sa demolisyon niadtong miaging Lunes diha sa barangay Talamban ning dakbayan sa Sugbu partikular na ang kabataan.

Kini tungod usab sa giingong kalisod na sa ilang kahimtang nga walay kapasilungan ilabi na kung dunay mga pag-uwan.

Ubo, sip-on ug hilanat maoy mga sakit nga giingong nasinati sa kabataan taliwa sa kainit sa adlaw ug kabugnaw sa kagabhion.

Gatusan ka pamilya ang nagpabilin pa sa ilang nahimutangan diha sa sitio Kalubihan sa barangay Talamban human sa demolisyon.

Si acting mayor Michael Rama mimando na sa City Health Department pagtan-aw sa panginahanglan sa mga masakiton sa samang higayon giawhag ang mga biktima nga moduaw sa health center sa barangay Talamban aron maatiman.

“I will have to invite them to be at the health center kay kung adto gud ta mo-establish sa lugar nga pribado, masaypan unya ta,” sumala ni Rama.

Lakip sa miawhag sa mga biktima nga moduol sa ilang barangay mao mismo si Talamban barangay captain Alvin Arcilla kinsa mipasalig nga ang ilang health center andam motabang kanila.

Gikasubo hinuon sa kapitan nga kutob ra diha ang ilang matabang sa mga gipalayas nga mga konstituwente gumikan kay duna may court order nga nagmando sa pagpapahawa kanila. (Elly Bolonos) (BANAT NEWS)