Ouano nalipay sa lumba sa kabayo

CEBU, Philippines - Gikalipay ni kanhi Mandaue City Mayor Thadeo Ouano ang dako na kaayong kalamboan sa gisugdan niyang tinuig nga lumba sa kabayo ug mga tartanilya sa reclamation area nga gibuksan kagahapon ug matapos ugma.

Ang lumba sa kabayo nga gitawag og “Governor’s Cup 2009 a horse show and competition” namugna sukad pa sa administrasyon ni kanhi Mayor Ouano.

Gipalambo sa kagamhanan sa lalawigan pinaagi ni Gobernador Garcia ug padayon gihapon kining gisuportahan ni Mayor Jonas Cortes kinsa nakakita usab sa kaayohang maangkon sa mga Mandauehanon.

Si Ouano miingon nga ang mithi ug liso nga iyang gitisok nga miturok, mitubo ug namunga, nga tataw na kaayo nga kapahimuslan sa kinabag-an sanglit nakahatag kini og dakong tampo alang sa kalamboan sa dakbayan sa Mandaue.

Matud pa niya nga dili kalikayan nga ang mga politikanhong tigpaniid sa dakbayan moingon nga ang mga Ouano maoy utok sa kalamboan nga nagsugod pa sa iyang amahan nga si kanhi Mayor Alfredo Pedong Ouano kinsa mao usab ang nagmugna sa reclamation area.

Sa reclamation area anaa mahimutang ang Cebu International Convention Center (CICC), merkado publiko ug uban pa nga mga dagkong kompaniya nga naghimo na karong labing popular sa tawag nga new Mandaue City. - Romeo T. Limpangog (BANAT NEWS)