Kontrobersyal nga Miss Cebu 2009 tukion

Cebu - Gipasalig ni Cebu City Acting Vice Mayor Hilario Davide III nga ilang tukion ang laing reklamo sa inahan ni Miss Cebu 2009 2nd runner-up Kimberly Therese Burden.

Gawas sa Texters’ Choice Award winner, gikwestyon na usab ni Doctor Rowena Burden ang nidaog sa Miss Cebu 2009 nga si Kris Tiffany Janson.

Sa gipadangat nga formal complaint ni ginang Burden ngadto kang Davide gihulagway niini nga dili makiangayon ang paghatag sa korona ngadto sa dalaga.

Kini tungod kay giingong wala moagi sa initial ug final screening si Janson sama sa giagian sa ubang mga kandidata nga niapil sa nahisgutang beauty pageant.

Subay niini niingon si Davide nga tukion unya sa ilang tigom sa Cebu City Tourism Commission (CCTC) niining semanaha ang gipadangat nga concern sa inahan ni Burden.

Ang acting vice mayor nga mao usab ang acting chairman sa CCTC nagkanayon nga ilang tun-an kung duna bay basehanan ang reklamo sa doktora.

“Estoryahan pa na sa komisyon, so, usa na sa among agenda, among tun-an kung angayan ba nga i-consider o dili,” sumala ni Davide.

Sa pikas bahin gipasalig ni Konsehal Gerardo Carillo nga mahuman na ang ilang gipahigayong imbestigasyon labot sa Texters’ Choice Award controversy.

Ang konsehal nga maoy gitahasan ni Davide nga mangulo sa fact-finding inquiry niingon nga ila nang tak-upan ang imbestigasyon niining semanaha.

Masaligon hinuon si Doctor Burden nga patas ang gihimong imbestigasyon sa komitiba ni Carillo labot sa nahisgutang kontrobersiya.

Nabulabog ang paghatag sa texters’ choice award dihang lain ang gitawag ug gihatagan niini og dili ang tinuod nga mananaug nga si Kimberly.

Butang nga dili madawat sa inahan niini ingon man sa iyang mga higala ug mga tigpaluyo hinungdan nga sila niprotesta. - Elly Bolonos (BANAT NEWS)