CEBU - Ang kapolisan sa Talisay City nawad-an na og paglaom nga mahimong “karera free” ang maong dakbayan gumikan sa paghitak niining maong ilegal nga sugalan diha sa maong lugar hangtod karon.
Gani niadtong Sabado nakasakmit na usab ang kapolisan og usa ka video karera (VK) dihang mialibwag og panagan ang mga sugarol nga nagtampunsisok niini atol sa ronda nga gihimo sa mga otoridad didto sa sitio Sambagan, barangay Tabunok, sa maong syudad.
Kini dihang may usa ka molupyo sa maong lugar nga mitaho sa kapolisan kalabot sa VK diin kasagarang mamusta niini mga batang gagmay.
Si Senior Inspector Jovito Canlapan maoy nanguna sa maong ronda uban nila ni PO3 Mikie Espina, PO3 Arnold Damasco ug PO1 Stephen Sefuesca.
Matud pa ni Inspector Canlapan nga ang maong VK diha ra ibutang sa usa ka payag-payag ug gibiyaan kini dihang mikabad og panagan ang mga sugarol pagka-amgo nila nga ang mga polis nagpaingon na sa ilang nahimutangan.
Walay nakatug-an sa kapolisan kun kinsay tag-iya sa maong sugalang de makina, matud pa ni Inspector Canlapan.
Midugang siya pagbutyag sa Banat News kagahapon sa buntag nga sayo niining tuiga, 62 ka makinang sugalan ang ilang nadauban ug walay labot kadtong 24 nga ilang gisunog niadtong buwan sa Oktobre ning tuiga.
Sa pagkakaron may pundo na silang 19 ka VK nga nasakmit nila sukad pa niadtong Nobiyembre ug gitakda nilang daoban na usab kini karong buwana.
Matud pa ni Inspector Canlapan nga maglisod sila pagtuo nga mahimong “karera free” ang dakbayan sa Talisay tungod kay ang mga opisyal sa matag barangay maglisod pagpitol sa mga maldito kaayong negosyante kinsa motago sa ilang VK sulod sa ilang balay o kaha sa mga lugar nga walay tawo aron walay madakpang tag-iya niining ilegal nga sugalan. – BANAT NEWS