Mediaman gipakitaag armas sa polis

CEBU - Usa ka polis ang gireklamo sa usa ka photographer sa The Freeman Newspaper ug ning pamantalaan human giingong gihagad sa maong polis og gubot ang naulahi gumikan lang sa usa ka traffic incident alas 10:00 pasado sa gabii niadtong Domingo diha may dalan Archbishop Reyes sa Bario Luz ning dakbayan.

Si Paul Jun Rosaroso nidangop kang Cebu City Police Office director Sr. Supt. Patrocinio Comendador kagahapong adlawa aron ireklamo ang maong polis nga giilang si PO3 Edmund Tiempo sakop sa Pardo Police Station.

Una nang gipa-blotter ni Rosaroso niadtong Domingo sa gabii diha sa Mabolo Police Station ang maong hitabo tungod sa kabalaka sa iyang seguridad.

Matud pa ni Rosaroso nga gikan siya sa ilang panimalay paingon unta sa Waterfront Hotel and Casino sa Lahug mihunong siya sa tunga sa dalan aron mo-left turn padulong sa maong hotel.

Si PO3 Tiempo gikatahong gikan sa may Ayala Business Park paingon unta sa Banilad gikatahong kalit lang ni-overtake ug diriyot maigo ang sakyanan sa mediaman.

Tungod niini iyang gitawag ang atensyon sa drayber sa multicab nga may plakang YEX-242 apan giingong wala kini manumbaling ug gibabag hinuon ang sakyanan niini sa iyang agian ug nikanaog.

Diha na niya mabantaying police kini ug nakaunipomer og General Office Attire nga gisapawan og jacket apan gikatahong isog kini kaayong miduol kaniya dayong walis sa jacket niini sa may hawakan aron ipakitang duna siya’y armas.

Human niini ang maong polis kansang nameplate may apelyedong “Tiempo,” maisugong miduol kaniya ug miingon kung gusto ba siya og gubot.

Bisan na ang gwardiya sa compound giwakli ug giingnang di mag-apil apil sa maong police dihang buot unta niining mopakalma sa duha.

Aron paglikay sa kagubot wala nalang motingog si Rosaroso ug gireklamo ang hitabo sa Mabolo Police Station.

Si Comendador mipatawag kang Tiempo kagahapon ug diha nalang niini nahibaw-ang sakop sa media si Rosaroso, ang duha nag-uliay na hinuon sa maayong buot human mangayo og pasaylo ang maong polis.

Si Comendador mipasidaan kang Tiempo nga di mag-abusar ug ibutang sa alimpatakan nga kini usa ka polis ug di angayang mag-inisog panahon magmaneho og sakyanan.

 Gisaway ni Comendador ang gihimo ni Tiempo tungod kay unsaon nalang kung yanong tawo ray gibuhatan niini sa maong polis. (BANAT NEWS)