Killer sa tomboy mitahan

CEBU - Human sa usa ka semanang pagtago-tago mitahan sa iyang kaugalingon ang suspek sa pagpanunggab patay sa usa ka tomboy tungod lang kay wala niya kini mauyoni nga makig-relasyon sa iyang anak babaye.

Nahitabo ang pagdunggab patay diha sa sitio Cansagiring, barangay Baring lungsod sa Carmen niadtong Miyerkules sa milabay’ng semana sa alas 8:30 sa gabii samtang padulong na mogawas sa trabahoan ang biktimang si Marilyn Fernandez.

Mitahan gahapon sa alas 7:20 sa buntag sa kapolisan si Arsolito Abayon, 43, molupyo sa nahisgutang lugar ug amahan ni Geralyn nga gikarelasyon sa biktima.

Matud ni Insp. Carlos Reyes Jr., hepe sa Carmen Police dihang nahinabi sa Banat News dugay na untang motahan ang suspek apan nagduha duha kini tungod sa kahadlok nga ang iyang asawa ug mga anak ang panimaslan.

Ang suspek gikatahong mitug-an nga wala siya magmahay sa pagpatay sa biktima tungod kay naluoy sa iyang anak babaye nga gikarelasyon niini kay magsige lang sila og away.

Makadaghan na niyang gibaharan ang biktima palayo sa iyang anak apan nagmagahi kini ug gitaban pa ang iyang anak.

Ang suspek napasakaan nang daan og kaso niadto pang Lunes ngadto sa piskalya ug gipaabot nalang ang pagdala kaniya ngadto sa bilanggoan. (BANAT NEWS)