Milk scare' higayon alang sa local dairy farmers

CEBU – Niabot na ang oportunidad alang sa mga local dairy farmers pag-promote sa ilang mga produkto subay usab sa nagpadayong “milk scare’ sa mga gatas nga gikan sa China.

Kini maoy gibutyag ni Konsehal Arsenio Pacaña, ang chairman sa Committee on Trade, Commerce, Cooperatives and Entrepreneurship sa City Council.  Subay niini giawhag sa konsehal ang mga local dairy cooperative sa Sugbu nga mupakita sa ilang mga produkto nga usa ka maayong alternatibo.

Nasayran nga ang mga sakop sa Cebu Federation of Dairy Cooperatives (Cefedco) dunay ubay-ubay nga mga dairy ug milk products nga gipamaligya.

Kini sama sa fresh milk, yogurt, cream, butter, milk bars, ug flavored nga mga gatas nga maoy sagad gamiton sa mga milk feeding program sa mga lokal nga kagamhanan.

Gipasalig ni Pacaña pagtabang sa mga dairy producer sa Sugbu pag-promote sa ilang mga produkto aron kini maoy paliton sa mga tawo.

Apan gusto usab sa konsehal nga mapalapdan pa ang produksyon sa Cefedco aron sarang nga maka-suplay sa panginahanglan sa merkado.

Subling gipahimangnoan sa konsehal ang katawhan ilabi na ang mga Sugbuanon nga dili una mopalit og mga milk products nga gikan sa China.

Kini samtang dili pa mohatag og advisory ang mga health authorities nga luwas na ang maong mga produkto gikan sa makadaot nga melamine.

Tambag ni Pacaña ngadto sa mga konsumedor nga imbes gatas gikan sa China, gatas na lang nga gikan ug gi-process sa Sugbu maoy paliton.

“Nganong ato man gyud nga irisgo ang atong kaugalingon nga nasayod na man ta, kung mupalit ta og gatas, kana na lang gyud nga hinimo dinhi sa ato,” sumala sa konsehal.

Sa kasamtangan, 28 pa lang ka dairy ug milk products ang natino sa Bureau of Food and Drugs (BFAD) nga walay sagol nga melamine.

Apan duha ka milk products ang napositibo sa maong matang sa kemikal ug kini mao ang Greenfood Yili Pure Milk ug Mengniu Drink.

Ang melamine una nang gikataho nga makadaut sa panglawas sa tawo ug maoy usa sa gitumbok nga hinungdan sa kidney failure. – BANAT NEWS