Mandaue magsaksak

Ang Sinanduloy sa Kabusog Sinanduloy sa Kahimsog kun Saksak program nga gipasiugdahan sa kagamhanan sa lalawigan sa Sugbo, gipaabot nga ikapatuman usab sa dakbayan sa Mandaue.

Si Gobernador Gwendolyn Garcia maoy nagpasiugda sa maong programa sa tanang kalungsoran ug mga dakbayan sa lalawigan pinaagi sa paghatag niini og P100,000 aron ipamalit og kamote ug laing P100,000 aron ipamalit og bugas gikan sa National Food Authority.

Gipaagi sa indigay ang maong programa ug kadtong lokal nga kagamhanan nga hingpit nga nakapatuman niini makadawat og ganti atol unya sa awarding ceremony sa umaabot nga Disyembre niining tuiga.

Ang Saksak progam maoy nakita sa gobernador nga paagi   aron sa pagdaginot sa bugas sa panahon nga maglung-ag kay bawion man kini sa isaksak nga kamote nga maoy gitawag nga sinanduloy.

Kining maong programa gipatuman sa gobernador aron dili kaayo mapiit sa kalisod ang mga kabus nga molupyo sa tanang dapit sa lalawigan.

Ang kagamhanan sa Mandaue City naningkamot usab nga makapatumang hingpit ning maong programa sa kagamhanan sa lalawigan.

Ang buhatan sa City Social Welfare o Municipal Social Worker maoy gitahasan sa lokal nga kagamhanan alang sa pag-ila sa labing kabus nga molupyo nga maoy gipahinungdan sa gobernador sa maong lalawigan.