Amahan midunggab sa asawa ug inahan

Usa ka lalaking hubog ang midunggab sa iyang asawa ug inahan ug migukod pa og kutsilyo sa iyang mga anak human kini badlunga sa inahan pag-inom-inom niini kagahapon sa kaadlawon.

Nalandig hinuon usab ang suspek nga si Franklin Lopez Echavez, 41, human kini puspusi og cement block sa iyang anak nga lalaki dihang iyang gituok ang asawang si Miraluna, 40 nga usa ka clinical instructor.

Sa imbestigasyon sa Homicide Section, gikatahong gibadlong ang suspek sa iyang inahan nga si Gloria, 62, tungod sa pag-inom niini apan gikatahong nasuko ang suspek ug misaka sa ilang lawak diin matulog ang asawa.

Dangtan pila ka gutlo ang magtiayon na usab ang naglalis ug migawas si Miraluna ug miadto sa kusina apan gikatahong gisundan kini sa suspek nga may dala nang kutsilyo dayong dunggab makadaghang higayon sa asawa.

Tungod sa singgit ni Miraluna niduol ang inahan sa suspek apan hasta kini gidunggab usab sa tuong bahin sa dughan, tungod sa komosyon hasta ang ilang mga anak nga si Mikhail, 18, ug ang 16-anyos nga anak nga babaye sa magtiayon nakamata.

Pagkakita ni Mikhail sa gihimo sa amahan niini diha sa iyang inahan ug apuhan gipatiran ug gisukmag kini sa batan-on hinungdan sa pagkahagba niini ug nakahigayon og panagan ang upat gawas unta sa balay.

Dihang kandaduhan na ni Gloria ang gate naabtan kini sa suspek ug gisukmag kini, gigukod dayon sa suspek ang iyang asawa ug mga anak, tungod kay samaron na si Miraluna nakuptan kini sa suspek ug diha-diha gituok.

Gumikan niini si Mikhail nipunit og cement block ug gihapsan ang ulo sa amahan hinungdan nga nakuyapan kini ug nakahigayon og eskapo ang mga biktima ug nadala sa tambalanan.

Samtang gidala usab sa mirespondeng sakop sa Emergency Rescue Unit Foundation ang suspek ngadto sa Cebu City Medical Center.