Duha ka menor nakaikyas sa rehab

Duha ka mga menor de edad nga nagpangidaron 16 ug 17- anyos ang naka-eskapo gikan sa Regional Rehabilitation Center for Youth (RRCY) nga nagbase sa barangay Candabong lungsod sa Argao sa milabay’ng udto.

Gikompirma ni Vivian Hurva ang center head sa RRCY dihang nahinabi sa Banat News nga ang 16-anyos nga naka-eskapo taga siyudad sa Toledo ug niadto pang milabay’ng semana nabalik sa ilang buhatan samtang ang 17-anyos nga taga lungsod sa Alcantara mo duha ka semana na kini sukad naduso sa ilang buhatan nga pulos nag-atubang og mga kaso sa pagpangawat.

Ang  maong mga menor de edad gibutyag ni Hurva nga nakahigayon pag-eskapo pinaagi sa pagkat-kat sa luyong bahin sa gate nga dunay motulo ka dupa ang gitas-on atol sa paniudto niadtong Martes.

Hinuon matod niya nga sagad sa mo-eskapo nga menor sa RRCY pulos gyud kini mga bag-o pa nga matugyan diha sa ilang buhatan tungod kay mag-adjust pa kini og posible nga mobalik ra usab sa umaabot nga mga adlaw ilabina kun mopauli sa ilang pamilya.

Matud ni Hurva nga gitugotan ang maong duha ka menor nga makasuroy-suroy human sa paniudto niadtong Martes diha sa usa ka payag-payag nga gitawag nila og resting place nga maoy lugar nga pundohan sa mga ginikanan nga mobisita sa ilang anak ilabina kay tingpahuway usab niadtong tungora.

Matud niini nga nakig-alayon na sila karon sa mga opisyal sa lungsod ug kabarangayan aron makit-an og balik ang maong ni eskapo nga mga menor ug ilaha na usab kining gipa-blotter ug gitaho sa ilang labaw nga buhatan aron makapanghunaw kun ugaling dunay mahitabo nga dautan sa gawas sa ni eskapo nga mga minor de edad.