Miyembro sa robbery gang girakrakan og Ingrams

Usa ka gikatahapang sakop sa robbery group sa lungsod sa Consolacion ug dakbayan sa Mandaue namatay human matusaktusak ang kalawasan sa mga bala sa Ingram nga gipusil sa wala mailhing lalaki  gituohang vigilante sa miaging gabii sa sitio  Hill Top, barangay Casili, lungsod sa Consolacion.

Ang namatay giila sa mga kabanay nga si Teofilo Medalla, nga taga Sto. Rosario sa barangay Jagobiao sa dakbayan sa Mandaue.

Si SPO2 Romulo Sasing nga nahinabi sa Banat News miingon nga nag-angkas si Medalla sa itom nga Honda Bravo nga motorsiklo nga nagdala sa plate number nga GC-1645.

Dugang pa niya nga kuyog sa namatay ang duha pa ka wala mailhing lalaki nga gigukod sa wala pa mailhing lalaki nga nagluwan sa kolor gray nga Adventure nga sakyanan.

Sa paghidangat sa maong lugar daw nawad-an kini sa pagpanimbang hangtod nga natumba ug ang duha dali nga nakabangon ug mikaratil og dagan pahilayo sa maong lugar.

Si Medalla nga wala dayon makalihok kay nadat-ogan ang tiil sa natumba nga motorsiklo maoy naabtan sa wala mailhing lalaki nga nanaog gikan sa giluwanan nga sakyanan nga nagdala og armas nga Ingram ug girapido sa pagpusil ang kalawasan.