Wanted nga pusher nadakpan

Nasikop sa mga sakop sa Criminal Investigation and Intelligence Branch (CIIB) ang usa ka level 2 nga drug pusher diha sa barangay Labangon kagahapong adlawa.

Ang nasikop mga alas onse sa buntag kagahapon mao si David Taboada, 32, nga taga  sitio Cogon sa nahisgutang barangay pinasikad sa warrant of arrest nga gi-isyu ni Regional Trial Court Branch 58 Judge Gabriel Ingles niadtong Enero 10 ning tuiga gumikan sa kalapasan sa section 11-12 Article 2 sa Republic Act 9165 nga paghupot sa ginadiling drugas ug mga kagamitan niini.

Way piyansa nga gitugot ang korte batok sa suspetsado sa paghupot niini sa ginadiling drugas apan P40 mil   ang giduso alang sa temporaryong kagawasan niini sa paraphernalia.

Si Taboada nalutsan sa maong warrant human kini maka-ipsot sa ilang operation niadtong Abril 24, 2007 diha sa panimalay niini diin ilang nakuha  ang usa ka dakong pakete sa ginadiling drugas, laing medium pack, ingon man mga kahimanan paghingos sa ilegal nga drugas.

Si Supt. Paul Labra II ang chief City Deputy Director for Administration sa Cebu City Police Office (CCPO) maoy ni-presentar sa akusado.

Sumala pa niini ngadto sa mga tigbalita nga si Taboada usa sa mga dagkong personalidad sa maong lugar diha sa Labangon ingon man sa mga silingang barangay niini diha sa Calamba.

Matud pa niini nga ang maong suspetsado usa sa ilang mga watchlist  ug  makabaligya og 200 gramos  hangtud usa ka kilo matag semana diha sa maong lugar.

Nunot niini iyang gipanglantawan  nga adunay epekto sa pagkunhod karon sa drugas sa maong dapit human usab sa pagkasikop sa suspetsado.

Si Taboada dihang gipangutana sa tigbalita nagdumili sa pagbutyag kun si kinsa iyang mga contact o kauban sa negosyo, apan gitug-an niini nga taud-taud na siyang namaligya  ug nahunong lang human siya magtago-tago didto sa Ormoc human makaipsot sa pagpangronda sa miaging tuig.

Gitug-an usab niini nga nabilanggo na siya kaniadto sa samang kaso apan nakagawas human makabutang og piyansa.