Trak sa Army natumba, 4 angol

Upat ka mga sundalo ang nangaangol human madisgrasya ang ilang trak nga gisakyan diha sa sitio Omaling sa barangay Babag 2 kagahapon sa kaadlawon samtang nagpadulong na pauli sa ilang kampo sa Balamban.

Si Lt. Col. Jefferson Omandam, tigpamaba sa Central Command nagkanayon nga ang maong trak usa ka Isuzu truck nga gipanag-iya sa 78th Infantry Battalion.

Matud pang Omandam  sa pakighinabi sa  Banat News gikan sa routine operation ang usa ka team sa 78th IB niadtong tungura dihang nasugamak sa disgrasya.

Giila ni Omandam ang drayber mao si Pfc. Pascual Sayson samtang ang nangaangol giila lang nga sila si Pfc. Cahinta, Pfc. Melcader Labus, Pfc. Bryan Fuentes ug Pfc. Jose Cabuguas.

Ang upat gikatahong nakaangkon og nagkadaiyang bun-og sa kalawasan ug sa ulo ug gikinahanglang dad-on sa Lapulapu military hospital diha sa Central Command ug karon luwas na ang kahimtang.

Usa ka tinubdan diha sa Central Command mitug-an nga gikan sa line company visit ang grupo ug pabalik na sa ilang kampo dihang nawad-an og brake ang maong trak ug tungod sa kakusog sa dagan niini natumba ang trak hinungdan sa pagkalagpot sa mga sakay niini nga miresulta sa ilang pagkaangol.