HLURB, DENR, DOH ang gibasol pagsulbong sa mga sam-ang

Gibasol sa lokal nga kagamhanan sa lungsod sa Daanbantayan ang tulo ka ahensiya sa nasudnong kagamhanan sa pagkatap sa daghang mga sementeryo sa bisan asang suok sa lungsod sa pagkakaron.

Ang mga ahensiya sa gobiyerno nga gihan-ukan sa pagbasol sa lokal nga kagamhanan mao ang Housing ang Land Use Regulatory Board, Department of Environment and Natural Resources ug Department of Health.

Gipatawag sa konseho sa lungsod ang kadagkoan sa nahisgutang mga ahensiya ug didto gipabuhagay ni Bise-Mayor Maria Luisa Loot ang kasagmuyo sa pagpasagad sa nahisgutang mga buhatan.

Nasuta nga ang mga pribadong sementeryo sa lungsod walay permit ug lisensiya nga ubos sa nahisgutang mga ahensiya.

Matud pa ni Loot nga kun ang lokal nga kagamhanan pa lang ang may gahum sa paghatag og lisensiya ug permit sa mga sementeryo, dugay ra niya kini gitagad ang maong problema sanglit dili maayo sa lungsod nga bisan asa nalang ang mga sementeryo ilabi na nga usa kini ka tourist destination sa nasud gumikan sa isla sa Malapascua.

Ang kagamhanan sa lungsod duna nay ordinansa nga napasar upat na ka tuig ang nakalabay apan wala napatuman gumikan sa giingong dili pagkooperar sa HLURB, DENR ug DOH.

Nunot niini gimandoan ni Loot ang tulo ka ahensiya sa paghimo og aksiyon sulod sa unom ka buwan ug kun dili kini masulbad, idangop na niya kang Gob. Gwendolyn Garcia.

Usa ka task force ang gitukod na sa tulo ka ahensiya ug lokal nga kagamhanan aron maoy mohan-ay sa kasulbaran sa problema.