Nitambong og disko gipusil

Patay ang usa ka 25 anyos nga lalaki human pusila sa wala mailhing tawo samtang gikan nitambong og disko uban sa iyang mga higala niadtong Martes sa kaadlawon diha sa Sitio Tiwasan, Catarman Liloan.

Ang gipusil ug namatay giila nga si Ardy Pepito Terana,lumad nga taga Batad, San Remegio ug kasamtangan nagpuyo sa nahisgutang lugar.

Nasayran ang biktima nanisko sa Sitio Bonbon  uban sa duha ka babaye nga silingan sila si Emely Branzuela ug Gladys Ancajas ug laing usa nga nailhan lang sa pangan nga Eldies gituuhang higala sa biktima nga taga Banilad dakbayan sa Mandaue.

Sa imbestigasyon ni SPO1 Dennis Ayuda pasado alas 3 sa kaadlawon samtang sila paingon na mamauli dihang ang higala sa biktima nga si Eldies nihangyo nga moinom og tubig.

Apan sila si Branzuela ug Ancajas nihangyo nga mouna nalang og pamauli.

Human nakainom og tubig si Eldies ang biktima nakadiseder nga ubanan kini nga mag-atang og sakyanan. Apan mao na kadto ang ulahing higayon nga nakit-ang buhi kini.

Si Branzuela kinsa padulong na og katulog niadtong tungura di layo sa gihitaboan mitug-an nga nakadungog kini og usa ka sipang buto sa armas ug pagkataod-taud ang iyang mga silingan nipahibalo kaniya nga ang biktima gipusil sa wala mailhing tawo.

Ang biktima nakaangkon og samad pinusilan sa tuong dalunggan ug nilapos ang bala sa pikas nga maoy nakaingon sa hinanaling kamatayon.

Si Dr. Francisco Dela Cueta, municipal health officer midiklarar nga patay na kini naabot sa iyang klinika.

Si SPO1 Ayuda nagkanayon nga walay kontra ang biktima diha sa ilang lugar apan buot nga imbitaron sa kapolisan si Eldies nga maoy labing ulahing nahibaw-ang kauban sa biktima aron kakuhaan og impormasyon kabahin sa hitabo.