Prinsipal nangumot, nanagpa'g maestra

Usa ka maestra sa eskuylahan sa gobyerno sa Talisay City mikiha sa iyang prinsipal tungod kay matud pa "gikumot" ang iyang baba ug gisiyagitan pa siyag "yawa" sa naulahi.

Si Angelita Ingente, hingkod, dalaga, magtutudlo sa usa sa mga tunghaan sa Talisay City mibutyag sa Banat News nga tua niya isang-at ang kiha kang Kapitan Celiapo Cabuenas sa barangay Lagtang ug sa pagsuwat ning maong balita nagpa-korasyon pa siya sa hospital.

Naghilak nga mitug-an si Ingente matud pa pwerte niyang uwawa sa daghang mga ginikanan ug mga estudyante kay gawas nga miwingig ang iyang dagway dihang gilubag kini human kumota gisinggitan pa siya og mga masakit kaayong pulong sa iyang prinsipal (ngan gipugngan lang una sa Banat News).

Si Ingente kinsa magtutudlo sa Grade 6 nagkanayon nga human komota ang iyang dagway nianang Biyernes, Marso 30 sa buntag naluya ug nawad-an na siya'g gana sa pagtambong sa ilang gradwasyon nianang pagkahapon.

Giasoy ni Ingente nga nasuko ang prinsipal dihang iya kining gipahibawo nga kuwang ang "toga" sa mga estudyante nga giorder.

Gibutyag ni Ingente nga nianang Huwebes ang iyang prinsipal maoy midawat sa gideliber nga mga toga gikan sa usa ka supplier nga prinsipal ra nila ang nasayod.

Apan matud pa ni Ingente nga pag-ihap niya sa mga toga nianang Biyernes sa buntag, kuwangan, busa gipahibawo dayon niya ang principal ug maoy hinungdan nga nasuko kuno ang naulahi ug dihadiha gikumot kuno dayon ang iyang dagway.

Miingon si Ingente nga gitug-an kuno dayon niya sa ilang Division superintendent, Dr. Carmelita Dulangon ang nahitabo ug gipaabot niyang molusad kinig imbestigasyon apan ang kasong kriminal iya gyung ipasaka sa korte.