Duha ka vintage bomb napalgan

Duha ka vintage bomb ang napalgan sa usa ka junkshop diha sa sitio Kangkong,Gun-ob dakbayan sa LapuLapu sa milabay’ng hapon.

Sa imbestigasyon sa SWAT team sa LapuLapu nasuta nga ang tag-iya sa maong junkshop mao si Frank Baring kinsa maoy nakamatikod diha sa tambak sa mga puthaw.

Tungod sa kabalaka dali niyang gipahibalo sa kapolisan ang maong mga bomba ug ang mga sakop sa Bomb Disposal Unit sa SWAT na maoy mikuha sa maong bomba aron mabutang sa mas luwas nga dapit.

Matud pa ni Baring nga posibleng dunay nagbaligya niini sa iyang buhatan ug wa kini mamatikdi sa iyang mga sakop nga naipon sa mga puthaw nga gipatimbang kanila.

Mao na kini ang ikaduhang insidente sulod sa usa ka semana nga dunay bombang nasagol sa mga pinalit nga mga puthaw sa usa ka junkshop diha sa maong dakbayan.

Ang unang insidente diha mahitabo sa sitio Humay-humay sa Pajo diin usa ka incendiary bomb ang napalgan dihang kalit kining miaso hinungdan nga ang tag-iya sa junkshop daling miitsa niini ngadto sa atabay. Ang maong bomba gidala sa Canjulao ug gipabuto.

Show comments