Tulisan napatay sa polis

Usa ka gidudahang tulisan napatay sa kapolisan human sa ginukdanay atol sa ilang pag-ikyas diha sa dalan Katipunan, La Paloma Village, sa Labangon sa milabay'ng gabii.

Patay nga nahidangat sa Cebu City Medical Center ang giilang si Francis Joel Romero,18, taga sitio Callejon sa Labangon kinsa nakuhaan og usa ka kalibre 38 nga rebolber nga may tulo ka buhing bala ug duha ka basiyo.

Nakuha usab gikan niya ang duha ka cellphone nga 8210 ug 3510i nga gituohang gipanag-iya sa mga pasaherong ilang gitulis.

Duha ka mga kauban sa biktima nga nakaeskapo giilang si Jonas Abanes alyas Angel ug usa ka naila lang nga Harvey, pulos taga sitio Cacao sa samang barangay.

Ang gikaengkwentro sa mga suspek mao ang grupo sa Theft and Robbery Section, Vice Control Section, Mobile Patrol Group ug mga sakop sa Punta Princesa Police station.

Sumala pang Sr. Inspector George Ylanan, hepe sa VCS, nga si PO1 Mark Manlosa sakop sa Traffic Group padulong na pauli sa ilang balay maoy unang nakasugat sa insidente sa tulis.

Matud pang Ylanan gikan sila nag-roving sa SRP dihang naalarma pag-abot nila sa dapit nga naagian nila si Manlosa nga dunay gigukod nga tawo hinungdan nga ila sad kining gigukod hinungdan nga misangpot sa pinusilay.

Si Romero naigo diha sa walang dughan ug sampot ug patay na kining midangat sa CCMC.

Sa report sa kapolisan, nasuta nga upat ka pasaherong sila si Marlon Abella, 23, Rosco Cabredo, 22, Paping Alconton,45, ug Loreto Tabares, 35, ang gikatahong gitulis sa tulo.

Nakuha gikan kang Abella ang iyang bracelet nga balor og P1,500, usa ka silver nga singsing usab nga balor og P600 ang nakuha kang Cabredo samtang ang duha ka mga cellphone iya nila ni Alconton ug Tabares.

Samtang gipanghimakak ni Ylanan ang pasangil nga gitiwasan si Romero sukwahi sa migawas nga report sa DyAB kagahapon sa buntag nga tiil ra kini naigo dihang gidala sa CCMC.