BID mitutok sa Summit

Tutokan ni BID Commissioner Alipio Fernandez ang ASEAN Summit hangtod kini matapos sunod semana.

Kini ang pamahayag ni BID 7 head supervisor sa MCIA Casimiro Madarang III nga nahinabi sa Banat News kagahapon.

Matud pa ni Madarang miabot si Fernandez ug personal nga moatiman sa mga delegado uban ni BID7 Regional Director Geronimo Rosas.

Gawas sa unom ka mga Immigration Officers ug 14 ka mga ahente sa BI sa kaulohan nga gituyo sa pagpadala dinhi sa Sugbu alang sa pag-augment sa pwersa sa BID 7.

Gipasabot usab ni Madarang nga sa milabay'ng adlaw ubay-ubay na ang nangabot nga mga government officials sa nagkadaiyang nasud nga lakip sa maong panagtigum ug posibleng karong adlawa mangabot ang mga "head of states" dinhi sa Sugbu ug ang uban manukad didto sa kaulohan.

Hinuon nalipay si Fernandez sa iyang nakita nga preparasyon sa iyang mga sakop dinhi sa BID 7 ug kini alang sa hapsay nga pamaagi sa pagdawat sa mga delegado ug mga bisita ilabi na ang mga turista nga mituyo pag-anhi sa Sugbu alang usab sa "Sinulog 2007 Festival."