Mananagat nahagbong, missing pa

Usa ka mananagat na-missing ug gituohang nahagbong sa giluwanan niining pumpboat atol sa ilang pagpanagat sa tungatunga sa kadagatan sa Hintutolan island sa Masbate ug Iloilo.

Ang nawala mao si Narciso Conde, 45, minyo ug adunay pito kabuok mga anak, lumad nga taga Tapilon, sa Daan Bantayan.

Si PO1 Ryan Castro sa kapolisan sa nahisgotang lungsod nga gikahinabi sa Banat News miingon nga ang tag-iya sa pumpboat nga si Vinceto Secuya maoy nagtaho sa ilang buhatan.

Matud pa ni PO1 Castro nga subay sa giasoy ni Secuya ngadto kanila nga ilang namatikdan ang kalit nga pagkawagtang ni Conde sa miaging kaadlawon.

Si Castro miingon nga natingala na lang sila si Secuya ug mga kauban dihang wala na kini makaluto sa ilang pagkaon nga mao unta ang naandan niining gimbuhaton sa matag kaadlawon.

Dugang pa ni Castro nga ilang nasayran kang Secuya ug sa mananagat niining kauban nga dagkong balod ang ilang nasugatan atol sa ilang pagpanagat sa maong lugar.

Si Conde nga nahinanok og katulog ang gituohang wala makamatikod hinungdan sa wala lamang damha niining pagkahagbong sa dagat.