Upat na ang patay sa kalag-kalag

Upat na ang namatay samtang 16 usab ang naangol sa managlahing aksidente sa kadalanan gikan sa dakbayan sa Mandaue ug lungsod sa Sogod atol sa kalagkalag.

Niadtong milabay'ng adlaw tulo ka tawo ang namatay sa Mantalongon, Dalaguete ug kagahapon namatay usab ang usa ka Victor Layon, 50 anyos, taga sitio Asinan sa barangay Mantuyong, Mandaue human kini maligsi og trak nga may trailer.

Si PO3 Nestor Monticello sa traffic section sa kapolisan sa maong dakbayan nga gikahinabi sa Banat News miingon nga si Layon milabang sa dalan Ouano Avenue sa reclamation area sa buntag sa milabay'ng adlaw.

Usa ka trak nga may giguyod nga trailer nga gimaneho ni Leo Arrabes, 43 anyos, minyo nga taga dalan L. Jayme sa Maguikay sa maong dakbayan maoy nakadasmag kaniya.

Matud pa ni Monticello nga grabe ang pagkaangol sa biktima kinsa gidali'g dala sa Mandaue City Hospital dayon gibalhin sa Vicente Sotto Memorial Medical Center apan nakabsan gyud kini sa kinabuhi.

Samtang sa lungsod sa Sogod, usa ka PUJ nga gisakyan sa 16 ka tawo nga padulong unta sa sam-ang sa maong lungsod ang nabalintong human mawad-i og brake hinungdan sa pagkaangol sa mga sakay niini.

Si PO1 Jodan Batucan sa Sogod Police Station nga gikahinabi sa Banat News miingon nga ang mga biktima gikan pa sa barangay Kaguyong, lungsod sa Borbon luwan sa pribadong sakyanan gimaneho ni Armando dela Rama, 36 anyos, minyo nga taga Borbon.

Apan samtang nagtadlas sa kurbadahong dalan sa sitio Emi barangay Dumlog sa Sogod dihang nawad-an kini og brake hinungdan nga nawad-an og kontrol si dela Rama ug natikalbong sa walang kilid ang sakyanan.

Ang mga sakay niini nakaangkon og mga pangos ug bukol samtang lakip sa nagrabehan mao ang lima pa ka bulang batang babaye nga si Beah Sophia Lobiano kinsa gidala sa Vicente Sotto Memorial Medical Center samtang ang ubang pasahero nalandig sa Juan Dosado Memorial Hospital.