Sindikato sa mga tulisan gikan Mindanao ipabungkag

Gimanduan ni Mayor Tomas Osmeña ang kapolisan nga doblehon ang paningkamot niini ug bungkagon ang grupo sa mga tulisan gikan sa Mindanao nga maoy gituohang responsable sa sunodsunod nga pagpanulis dinhi sa dakbayan sa Sugbo.

Matud ni Osmeña kumbinsido siya nga mobalik sa normal ang kahusay ug kalinaw dinhi sa dakbayan kun ugaling mabungkag na ang maong grupo sa mga tulisan nga gihulagway sa mayor nga susama sa usa ka sindikato.

Gitug-an ni Osmeña nga nakadawat siya og impormasyon nga usa ra ang grupo nga responsable sa sunodsunod nga pagpanulis dinhi sa dakbayan ug kini mao ang pundok sa mga tulisan gikan sa Mindanao.

Hinuon giklaro sa mayor nga dili pa kini alarming ug wala makaapektar sa nagsingabot nga 12th Asean Summit nga ipahigayon dinhi sa Sugbo karong Disyembre 11 ngadto sa 14.

Niadtong niaging Sabado sunodsunod nga gitulis ang Alano and Sons Finance Corporation sa dalan Escario ug ang branch niini nga G.A. Countrywide Finance Corporation sa may T. Padilla Extension ug samtang niadtong Lunes sa hapon gitulis usab ang Visayan Electric Company (VECO)-Mandaue nga nakuhaan og P1.7 milyones.