Mipatay sa Kano pasakaa'g kaso

Suspek sa pagpatay sa usa ka Amerikano niadtong milabay'ng buwan diha sa dalan R. Duterte Lupa, Banawa, Guadalupe ning dakbayan gipasakaan na og kaso sa Homicide Section.

Ang gunman positibong giila sa tulo ka mga testigo lakip na ang 11 anyos nga anak sa pangasaw-unon sa Amerikanong si Victor Noe nga si Catalina Cabanes.

Ang gipasakaan og kaso mao si Christopher Luna alyas Tope nga taga Buhisan ning dakbayan ingon man ang wala mailhing lalaki nga maoy nagmaneho sa motorsiklo atol sa pagkahitabo. Si Luna gitumbok nga notadong gun- for-hire dinhi sa Sugbo sumala pa sa kapolisan.

Ang picture ni Luna ug ang sketch nga gipakita ngadto sa mga testigos mitakdo sa tawong nakita nila atol sa pagpusil ug mga tawong nangita sa mga biktima pila na ka adlaw ang milabay una pa sa pagpamusil.

Sumala pa sa anak ni Cabanes nga gikan pa sila sa Department of Foreign Affairs alang sa paghikay sa passport sa iyang half-sister ug gikan didto naniudto sila sa usa ka fastfood chain.

Samtang nangaon mitingog ang cellphone ni Noe ug may gikaestorya sa telepono, human sa pagpangaon nadunggan niya si Noe nga misulti sa iyang inahang si Catalina nga dili una sila molahos og uli sa San Agustin Heights sa Tisa ning dakbayan kay mohapit una sila sa Banawa (lugar nga gikahitaboan).

Apan sa pagkanaog pa lang nila sa taxi kalit nga giduol ni Luna si Noe nga iyang gitawag og "Tatay" ug kalit nga gipusil makausa, human niadto gition usab ngadto sa ulo sa iyang inahan ang armas ug gipusil usab kini dayon mibiya sakay sa usa ka motorsiklong nagpaabot.

Si Cabanes naigo diha sa walang tampihak apan nabuhi samtang si Noe naigo sa luyong bahin sa ulo nga milapos diha sa nawong, patay kini dayon.

Samtang laing duha ka testigos mao ang mga gwardiya sa San Agustin Heights nga duha ka higayon nakakita kang Luna diha sa pinuy-anan ni Noe.

Matud pa sa duha nga makaduha ka higayon nga mianha diha si Luna ug usa ka wala mailhing lalaki diha sa subdivision nga nangita kang Noe. Si Noe mireklamo niini ngadto sa presidente sa ilang homeowners association kabahin sa unang pag-anha sa duha.

Human gisita sa mga gwardiya ang duha wala na kini mobalik, apan niadtong Hulyo 24 nakugang na lang sila dihang nahibaw-an nga gipusil ang magtiayon.

Sumala pa ni SPO1 Jay Yballe sa Homicide Section nga naglisod pa sila pagkonektar sa hitabo ngadto sa gidudahan nilang mastermind sanglit walay laing makatug-an niini kun dili si Cabanes kinsa naglisod pa karon sa pagtubag sa mga pangutana sa kapolisan tungod sa kahimtang niini.