Matud pa ni CPPO Director Vicente Loot nga si Mayor Neal Vergara ang nihangyo kaniya human nangayo og ayuda si Bise Mayor Bernard Sepulveda og dugang seguridad sa iyang pagpuli isip bag-ong administrador ni Lhuilier.
Si Sepulveda maoy gitudlo nga mohulip kang kanhi konsehal Sonia Fua apan nagdumili kini sa pagbiya sa katungdanan.
Alas 10 sa buntag niadtong Sabado, si Sepulveda nangayo og security assistance atol sa turn-over sa mga dokumento ug mga lisensiya ni Lhuilier gikan sa daan nga administrador hinungdan nga gipadala ni Loot ang usa ka team sa SRU.
Nabalaka si Loot nga sakyan sa mga rebelde sa midnorth area ang maong kagubot maong iyang gimandoan ang bisan kinsang grupo nga makig-alayun gyud sa kapolisan sa lungsod sa Borbon ilabi na kon may mga armas.
Gimandoan usab ni Loot ang iyang mga sakop nga dakpon kadtong mga tawo nga magkupot og armas nga magdumili sa pagpakig-alayun kanila ug kon mahimo pusilon gyud kon kini mosukol.
Nasayran nga niadtong Sabado sa hapon, ang mga security guard ni Lhuilier nga sila si Julio Rentiza Jr. ug Roger Sumayang samtang nihimo og roving patrol gihulga sa usa ka Rolando Bucog pinaagi sa pagtion og armas.
Matud pa nga si Bucog namulong nga "mga samukan man mo kaayo."
Laing security guard nga si Genesis Arnejo ang nipasangil usab nga si Onie Catubig, konsehal Noel Dotillos ug konsehal Roy Melgo sa lungsod sa Borbon apil na si Bucog ang nipugos pagsulod sa lugar ni Lhuilier sa barangay Binghay.