Opinyon ni Teves gitinguha

Mangayo og legal opinion ang kagamhanan sa dakbayan sa Sugbo ngadto kang Finance Secretary Margarito Teves kun dili na ba obligado ang kompaniya nga mobayad og buhis ngadto sa dakbayan sa Sugbo kun ang mga sangang buhatan niini nagbayad na og buhis ngadto sa lain laing mga lugar.

Si Mayor Tomas Osmeña dakong supak sa gipagawas nga baruganan sa International Pharmacuetical Incorporated (IPI) nga nangangkong dili na obligadong mobayad og buhis ang maong kompaniya gumikan kay nagbayad na kini og syento porsiyento nga sales tax ngadto sa mga siyudad ug kalungsoran diin nahimutang ang ilang mga sangang buhatan.

Nasayran nga si Atty. Manuel Espina abogado sa IPI, maoy mi-insister nga dili obligado ang ilang kompaniya sa gipangayo nga buhis sa dakbayan ug andam nila kining atubangon sa korte.

Ilang gibasihan ang gipagawas nga legal opinion gikan sa Bureau of Local Government and Finance (BLGF) executive director Presentacion Montesa niadtong petsa 7 sa Enero tuig 2004 nga mipadayag nga dili obligado nga mobayad sa maong buhis ang IPI.

Apan alang kang Osmeña nagtuo siya nga gilipatlipat lang og wala masayod sa kinatibuk-ang sitwasyon ang opisyal sa BLGF hinungdan nga mipagawas kini sa maong legal opinion.

Pabiling gibarugan sa mayor nga duna kini katungod nga mokolekta og buhis sa IPI ilabi na kay ang manufacturing sa mga produkto sa maong kompaniya nahimutang kini sa Juan Luna Avenue barangay Mabolo diin ang kagamhanan sa dakbayan maoy nag-antos sa polusyon ug maoy nagpa-angay sa serbisyo sama sa paghipos sa ilang mga basura matag adlaw.