Gibutyag ni Mark Israel, presidente sa CARE nga ang maong mga technical personnel mopresentar kini sa kinatibuk-ang detalye kabahin sa ilahang hugtanong pagbabag sa katukoran sa maong planta.
Ang mga enhinyero nga ipadala sa CARE gilangkoban kini nila ni Engr. Vicente Obando retiradong engineer sa NAPOCOR, Engr. Archimedes Reroma kanhi engineer sa Atlas Mining Corporation ug Sister Luz Dulala usa usab ka chemical engineer nga kanhi kawani sa RSCG.
Hinuon plano sa CARE, matud ni Israel, nga mohangyo sa RDC nga i-reschedule ang maong hearing ilabi na kay atrasawo na kaayo nga napahibalo sila ning maong kalihukan ug naglisud na sila pagpahibalo sa ilang mga sakop pagtambong niini.
Matud ni Israel angay'ng mahatagan sila ug pahibalo sa maong hearing duha ka semana pa sa dili pa ang petsa sa pagpahigayon niini aron hingpit nilang mapangandaman ang maong kalihukan.
Ang CARE kusganong mibabag sa pagtukod sa maong expansion nga planta sa Salcon-Kepco gumikan kay gihulagway nila kini nga peligro sa panglawas sa mga molupyo sa Naga ug makahubas usab kini sa tinubdan sa tubig niini nga gamiton unya sa operasyon sa maong planta.
Samtang gibutyag ni Engr. Raul Estrelloso manager for administration sa Salcon nga igo lang silang mopresentar sa RDC kabahin sa status sa maong proyekto.
Matud ni Estrelloso nga ang ilang vice president nga si Renerio Lastimoso maoy motambong sa maong hearing ug mopahibalo nga nahuman na ang pagpahigayon ug public hearing sa maong proyekto ug gipaabot nalang karon nila ang approval sa Department of Environment and Natural Resources (DENR) sa gi-apply nila nga Environmental Compliance Certificate (ECC).