Nunal (76)
MABIGAT ang dahilan kung bakit kailangang magtago si Mahinhin. Maaaring may alam siya sa kinaroroonan ng droga ni Tsekwa. Hindi siya magtatago kung hindi mabigat ang problema.
Pero bakit kaya hindi sinabi sa kanya ang tungkol dun. Naikuwento na rin lang sa kanya ang tungkol sa buhay nito at ang mga pagpapakasakit para mapag-aral si Bighani ay kung bakit nilihim pa ang tungkol kay Tsekwa. May peklat palang malaki sa kaliwang pisngi si Tsekwa dahil sa paghampas ni Mahinhin.
Siguro, pinag-isipang mabuti ni Mahinhin ang gagawin at ang pag-alis na lamang o pagtatago ang ginawa. Naisip ni Robert, sana, sinabi sa kanya ni Mahinhin ang lahat para natulungan niya. Hindi gaya ngayon na wala siyang ideya kung saan makikita si Mahinhin. Sana, maisipan nitong i-text siya para gumaan naman ang loob niya. Iba ang nararamdaman niya para kay Mahinhin. Sana magpakita na si Mahinhin sa kanya.
ISANG araw, nakarinig si Robert ng tawag mula sa labas ng bahay.
Nang tingnan niya, si Nesto.
“Halika Nesto pasok.’’
Pumasok si Nesto.
“Ano ang balita, Nesto?
“May dala akong retrato ni Tsekwa, Sir Robert. Para makita mo ang itsura niya.”
Ipinakita ni Nesto. Malaki at mahaba ang peklat ni Tsekwa.
“Saan mo nakuha ang picture, Nesto.’’
“Naghalungkat ako sa bahay. Mabuti at naitabi ko.’’
“Madali palang makilala ang tsekwa dahil sa peklat.”
“May nasagap akong balita Sir Robert na pinaghahanap na si Tsekwa. May nakapatong daw na pera sa ulo sa sinumang makakahuli rito.
(Itutuloy)
- Latest
