Nunal (57)
NAGPATULOY si Mahinhin sa pagkukuwento tungkol sa ginawa sa kanya ng Tsekwa na may-ari ng Pugad-Uwak KTV club.
Palabas na raw siya sa room nang maabutan siya ng Tsekwa at nahawakan sa balikat. Kahit may sugat sa noo ay malakas pa rin.
“Nagpipiglas ako para makawala. Sabi ng Tsekwa, pumayag na raw ako sa gusto niya. Lahat daw ay ibibigay niya sa akin. Hindi raw ako magsisisi. Anumang gusto ko ay sabihin lang daw at ipagkakaloob niya. Talagang patay na patay daw siya sa akin.
“Pero malakas na pagtanggi ang sagot ko sa Tsekwa. Sabi ko, hindi ko kailangan ang pera niya. Sabi ko tatawag ako ng pulis kapag hindi niya ako pinakawalan. Pero lalo siyang nagalit. Hindi raw ako tutulungan ng pulis. Nakatimbre na raw siya. Huwag na raw akong magpakipot pa dahil wala na akong magagawa.
“Pero ang hindi alam ni Tsekwa, nag-iisip na ako ng paraan kung paano makakawala sa pagkakahawak niya. Tumiyempo ako. Bigla ko siyang siniko sa sikmura. Dahil matanda na, napaupo siya. Hinahabol ang hininga.
“Sinamantala ko ang pagkakataon. Mabilis kong nabuksan ang pinto at nakalabas. Walang tigil ang pagtakbo ko. Hanggang sa makakita ako ng taxi. Kinawayan ko. Lumapit at mabilis akong sumakay. Sabi ko sa drayber, sa bus terminal. Sa isip ko nun, bahala na. Basta ang mahalaga ang makaalis ako sa bahay na iyon.”
(Itutuloy)
- Latest