Pagpanormal sa blood sugar (1)

Segun sa mga eksperto sa panglawas, unya sa tuig 2030, mokabat na ngadto sa 550 ka milyon ka tawo ang magka-diabetes-2. Kini base sa gihimong pagtuon ug pag-monitor sa mga institusyon sa tibuok kalibutan.

Kini nga matang sa sakit nga diabetes, gikonsiderar kini sa medical nga usa ka chronic disease, nga maoy gitumbok ang prinsipal nga hinungdan niini mao ang kawala’y disiplina sa isulod sa atong ginhawaan, sama sa mga pagkaon ug ilimnon.

Ang modernong teknolohiya nakatampo sab niini, gumikan sa kasayon, maagni kita sa mga pagkaon nga ‘ready-to-eat’, nga nawala ang pagka-organic niini. Halos tanang mga pagkaon nato gikuha sa grocery nga pulos na nga giproseso.

Mga artipisyal nga naalid-an na ang mga natural nutrens nga mao gayud unta ang gikinahanglan sa kahimsog sa panglawas ug mao na kini karon ang nahimo natong estilo sa pagkaon, nga wa’y langan, makakaon dayon.

Mawala na ang kontrol sa angay kaonon, hangtod madebelop ang sakit nga diabetes 2. Apan may tsansa pa nga ato ni nga malikayan. Ang grabeng maidulot niini sa lawas nga mao ang diabetes, makakomplikar kini sa daghang sakit.

Sama nga kini makadaot sa panan-aw o dili na kaayo makakita, atake, makabakol kay maputlan sa tiil nga nagbasa sa samad o nanglagom, malipong wa’y kusog ug daghan pa. Gumikan kini sa blood sugar nga dili na mous-os, nga maapektohan ang mga sistema sa lawas, labi na og magkaluya ang imyun, nga dali kasudla’g mga sakit.

Sa ato pa ang blood sugar kanunay nato kini nga monitoron aron may ideya kita sa pagkontrol nga monormal, gikan sa 80-120mg/dl.

Kun motaas nga 200 mg/dl, ayaw pasagdi nga permi ingon niini, kay maglisod o maanad nga dili ka na kapaubos hangtod mas motaas pa ang blood sugar nimo.