Olivarez sasagupa kay Arcilla para sa men’s singles title
MANILA, Philippines - Sinakyan ni Eric “Jed” Olivarez Jr. ang kanyang magandang simula sa bawat set para sibakin si second seed at doubles partner niyang si PJ Tiero, 6-4, 6-4, papasok sa finals ng men’s singles event ng Olivarez Cup Open Tennis Championship kahapon sa Olivarez Sports Center sa Sucat, Parañaque.
Nauna nang dinispatsa ni Olivarez, nasa bakasyon sa Western Michigan University, sina fourth seed Vicente Anasta, 6-4, 6-2, sa Last 16 at No. 5 Leander Lazaro, 6-3, 6-4, sa quarters.
Sasagupain ni Olivarez si top seed Johnny Arcilla para sa korona at premyong P50,000.
Pinatalsik ni Arcilla si No. 3 Jason Patrombon, 7-5, 6-4, sa isa pang Final Four clash sa pang-walong edisyon ng annual event na inorganisa ni Parañaque Mayor Edwin Olivarez kasama sina Rep. Eric Olivarez at Dr. Pablo Olivarez bilang bahagi ng kanilang long-time commitment para palakasin ang sport.
Magtatagpo sina Olivarez at Arcilla para sa korona ngayong alas-10 ng umaga.
Samantala, nakalapit naman si Khim Iglupas para sa kanyang ikaapat na sunod na women’s singles title sa event na suportado ng Palawan Pawnshop, Stronghold Insurance, Milestone Guarantee Assurance Corp. at Sterling Insurance Company matapos talunin si Patricia Velez, 6-0, 6-2, sa kanilang semis duel.
Binigo naman ni No. 3 Marian Jade Capadocia si Compostela Valley netter Shaira Riviera, 6-2, 6-1, sa isa pang semis match.
Tinalo naman nina Olivarez at Tierro sina Joshua Kinaadman at Gabriel Peña, 6-3, 6-1, para umabante sa men’s doubles semis katapat sina top seed Patrombon at Manuel Balce III, dinaig sina Russell Cero at Wydel Deha, 6-4, 3-6, 10-8.
Pinatumba nina Arcilla at Ronard Joven sina Lazaro at Fritz Verdad, 6-4, 6-2, patungo sa semis.
- Latest