Top seed puntirya ng Foton vs Petron
Laro Ngayon
(Batangas City Coliseum)
5 pm F2 Logistics
vs Sta. Lucia
7 pm Foton vs Petron
MANILA, Philippines - Puntirya ng Foton na maipormalisa ang pagkopo sa top seeding sa quarterfinals sa pagharap sa Petron ngayong gabi sa Philippine Superliga (PSL) All-Filipino Conference na dadayo sa Batangas City Coliseum sa Batangas City.
Nakatakda ang salpukan ng Tornadoes at Blaze Spikers sa alas-7 ng gabi habang magsisilbing pampalabok ang bakbakan ng nagdedepensang F2 Logistics at Sta. Lucia Realty sa alas-5 ng hapon.
Hawak ng Foton ang liderato sa Pool C tangan ang malinis na 5-0 rekord habang nasa ikalawang puwesto ang Invitational Cup champion Cignal na may 4-1 baraha kasunod ang Petron (3-2) at Generika-Ayala (2-3).
Galing ang Tornadoes sa 19-25, 20-25, 25-18, 25-15, 15-7 come-from-behind win laban sa Lifesavers noong Huwebes.
“Things are now getting tough. Everybody is playing hard. We have to double our effort and correct our mistakes. Petron is a very good team. They are coming off a loss. We have to be prepared because they will surely go for this important victory,” sambit ni Foton coach Moro Branislav.
Gaya ng dati, sesentro ang opensa ng Tornadoes kay skipper Jaja Santiago na siyang top scorer ng tropa habang nariyan din sina Ennajie Laure at Maika Ortiz para bigyan ng suporta ang 6-foot-5 opposite hitter.
Malaki rin ang kontribusyon ni Christine Joy Rosario gayundin nina Ivy Perez, Shang Berte at libero Jen Reyes.
Kung makukuha ng Foton ang top seeding, makakasagupa nito sa crossover quarterfinals ang Cherrylume.
- Latest
