Mga makadaut sa atay (1)

Daghan na ang nag-antos sa nagkalainlaing sakit sa atay, nga unta matud nila, mainampingon man sila sa pagmentinar sa kahimsog sa panglawas. Tingali may nataligam-an lang nga mao’y nakaingon sa pagtuo nga kini makaayo apan diay makadaut sa atong atay. Sama na lang niining mga mosunod ;

* Asukar —Ang grabe kahinam-is ini dili lang makakutkot nga mogabok ang ngipon makadaot sab kini sa atay. Ang asukar nga  refined white sugar  ug ang  high fructose sama sa corn syrup makapatambok kini sa atay. Nadiskubrehan sa mga pagtuon, nga mas labaw pa kini makadaot kaysa alcohol.

* Suplemento nga herbal — Bisan pa man tuod nga kini  natural gikan sa tanom mahimo nga kini dili OK para nimo. Sama sa herbal nga kava-kava, makatabang kini sa nagmenupos nga babaye kay makaparelaks ni sa ugtas o  stress. Apan ang uban ini dili makauyon nga mosangpot sa sakit sa atay nga  hipatitis. Nadiskubrehan sab sa pagtuon, nga kini grabeng makapahago o makaugtas sa trabaho sa atay.

* Sobra katambok —Ang obese o sobra ang gibug-aton sa timbang ang lawas tungod sa labihang katambok ini makadaut sab sa atay. Madebelop ang sakit sa atay ang (NAFLD)  Non Alcoholic Fatty Liver. Madugayan mogahi ang tambok nga atay masamdan ang mga tisyo ini. Tambok unya dayabetison sagad maigo ining sakita. Busa  magdiyeta ug mag-ehersisyo.

* Vitamin-A supplement — Gikinahanglan kini sa maayong panglawas. Apan aron dili ni makadaut sa atay  mas maayo kanang gikan sa tanom o natural herbs’ nga suplemento, nga gikan sa utanon/prutas nga pulahon o yelohon. Apan ang sobra nga  dosage  ini, magkaproblema gihapon ang atay nga mapalabihan ang pagtumar sa vitamin-A, samot kun sentetik nga suplemento.