Balik uli sa itaas: TNT Katropa tinakasan ang Globalport

MANILA, Philippines – Nagposte ang TNT Katropa ng malaking 24-point lead sa second period.

At muntik na nilang maisuko ang panalo laban sa Globalport para manati­ling hawak ang liderato ng 2016 PBA Governor’s Cup.

Kumamada si point guard Jayson Castro ng game-high na 37 points, tampok ang 6-of-11 shoo­ting sa three-point range, at 8 assists para tulungan ang Tropang Texters sa 122-120 pagtakas kontra sa Batang Pier kagabi sa Smart Araneta Coliseum.

Bumangon ang TNT Katropa sa nauna nilang kabiguan sa Mahindra para ilista ang pang-pitong panalo sa walong laban, habang napigilan naman ang three-game winning streak ng Globalport para sa kanilang 3-5 marka.

Ang top four teams sa quarterfinals ang makakakuha ng ‘twice-to-beat’ incentive laban sa mga uupo sa No. 5, 6, 7 at 8 squads.

“Bumaligtad yung laro eh,” sabi ni coach Jong Uichico. “Globalport can really score, especially when (Stanley) Pringle and (Terrence) Romeo get it going. We fell into a lull in the offense in the latter part.”

Inilista ng Tropang Texters ang 24-point advantage, 46-22, mula sa three-pointer ni Castro sa 9:08 minuto ng second quarter hanggang makalapit ang Batang Pier sa 116-120 agwat sa huling 1:16 minuto ng final canto.

Ang drive at fastbreak basket ni Stanley Pringle ang nagtabla sa Globalport sa 120-120 sa nalalabing 41.7 segundo bago isinalpak ni Ranidel De Ocampo ang isang krusyal na jump shot galing sa kick out ni Castro para muling ilayo ang TNT Katropa sa 122-120 sa huling 5.7 segundo.

Sa opensa ng Batang Pier ay sumalaksak si Pringle at ibinalik ang bola kay Jay Washington na hindi nito nasalo.

Nagdagdag si De Ocampo ng 17 points para sa Tropang Texters kasunod ang 14 ni Larry Fonacier, 11 ni Ryan Reyes at 10 ni Asian import Mike Madanly.

Samantala, kasaluku­yang naglalaban ang nagdedepensang San Miguel Beer at Meralco habang sinusulat ito.

TNT Katropa 122 - Castro 37, De Ocampo 17,  Fonacier 14, R. Reyes 11, Madanly 10, Williams 8,  Ammons 7, Rosales 7, Tautuaa 6, Rosario 5, Carey 0, Rosser 0.

Globalport 120 - Glover 38, Romeo 33, Pringle 25, Washington 9, Taha 5, Salvacion 3, Semerad 3, Dehesa 2, Yeo 2, Mamaril 0.

Quarterscores: 35-18; 70-52; 96-86; 122-120.